Publicacións

Este documento de Estudo técnico, histórico, paisaxístico e ambiental do estado actual do río Tins no ámbito urbano de Outes realizado pola UDC no primeiro semestre de 2023, está enmarcado na acción A1 de Creación da estratexia de reordenación e integración ambiental do proxecto Renatur_Outes.  Trátase dunha análise pormenorizada dende o punto de vista: (i) histórico, a través da historia do entorno e da evolución do ámbito de actuación no tempo; (ii) técnico, profundindo na definición e xestión urbanística do espazo, na lexislación hidrolóxica e no estudo dos proxectos de modificación do propio río e o seu leito; e (iii) paisaxístico, isto é, artístico e ambiental. O obxectivo é profundar no coñecemento do ámbito e servir de base para a elaboración do Plan Estratéxico de Reordenación de Espazos e Integración Ambiental do Río Tins. En paralelo, dende a Universidade da Coruña, están a levarse a cabo un proceso de deseño enfocado a comprender e analizar os problemas do estudo, un proceso académico co alumnado e profesorado da materia de Proxectos 9 do grao en Estudos de Arquitectura da UDC e un proceso participativo no lugar do proxecto. Froito destes procesos dará lugar o Plan estratéxico.

Existe un número crecente de indicadores que nos informan que estamos perdendo diversidade de especies nos nosos ecosistemas. Nun mundo altamente interconectado, onde o comercio e o intercambio de recursos non para de medrar, o número de especies exóticas invasoras (EEI) está crecendo rapidamente. De feito, as invasións biolóxicas son unha das ameazas mundiais máis eminentes para a biodiversidade, os servizos dos ecosistemas e os medios de vida.
Os ríos teñen un gran valor cultural, estético, socioeconómico e ecolóxico. Proporcionan beneficios difíciles de cuantificar a persoas de todo o mundo, sendo esenciais para a economía sostible do estado. O seu valor natural, estético e económico vese diminuído polas EEI e a súa perda significa un enorme retroceso da posta en valor do medio cultural e natural próximo.
A presenza de plantas exóticas constitúe unha seria ameaza para os ecosistemas riparios xa que se espallan e medran rapidamente, podendo converterse, en moitos casos, en invasoras. As EEI desprazan ás especies autóctonas, reducen a eficacia dos servizos dos ecosistemas e causan importantes perdas na economía. Estas plantas forman extensións monoespecíficas mudando a composición das comunidades e reducindo a abundancia de especies nativas. No leito do río, impiden o movemento libre da auga, facilitan o aumento dos asolagamentos, reducen os niveis de osíxeno e diminúen a calidade da auga.
Este catálogo de especies aspira a ser unha ferramenta necesaria dentro das estratexias de xestión das especies invasoras na bacía do río Tins. Pretende dar a coñecer aquelas especies que, sendo exóticas, son causa de risco ou xa causan un dano ao ecosistema ou ben, por atoparse en bacías de ríos próximos, poidan ser unha ameaza. Enténdese este listado como predisposto a súa actualización periódica en función dos novos datos que se aporten, axudando á alerta temperá e a unha resposta rápida na xestión.
Na elaboración deste catálogo introducíronse datos que pretenden axudar á comunidade docente a transmitir información e á realización de actividades de coñecemento do medio capaces de sensibilizar do dano das EEI e do beneficio de conservar a biodiversidade.